Каталог библиотеки

«Абайдан соңғы арыстар» — қазақ халқының даңқты перзенттерінің елінің тәуелсіздігі үшін күрескен кзеңін суреттеуге арналған эпикалық роман-трилогия. Баршаға мәлім, «Алаш» өкіметі 1918 жылдың жазында Орынбор қаласынан Семейге қоныс аударады. «Алаш» өкіметін қазіргі Абай ауданының Шаған өзенінің бойында қарсы алу салтанаты болады. Оған Қызылжар, Қараөткел, Қарқаралы, Көкшетау, Кереку, Сергиополь, Зайсан мен Өскеменнің ел басшылары қатысады. Романда «Алаш» басшылары Әлихан мен Ахмет, Жүсіпбек, Халел, Әлімхандардың сол кезеңдегі іс-әрекеттері жан-жақты суреттеледі. Шәкәрім, Абай баласы Мекайіл, Мұхтарлар да барлық оқиғаларға тікелей араласып отырады. Автор бұл еңбегінде халқымыздың ардагер ұлдарының асқақ бейнесін әр қырынан сомдап, жұртшылық санасында қайта жаңғыртуды мақсат тұтқан. Кітап көпшілік оқырманға арналған.

Жүсіпбек Аймауытовтың «Ақбілек» романының желісі басты кейіпкер Ақбілектің төңірегінде өрбиді. Автор Ақбілек арқылы ХХ ғасырдың басындағы қазақ қыздарының мұңлы шері мен зарын және әйелдердің қоғамдағы орнын, қазақтың салт-дәстүрін, ар-намыс сияқты мәселелерді баяндаған. Тағылымға толы туынды сол кездегі өмірде кездескен шынайы оқиғалардан құралған. Кітап көпшілік оқырманға арналған.

Бұл жинаққа белгілі жазушы Ғабит Мүсіреповтің ана туралы әңгімелер циклі және «Жиырма төрт сағатта», «Айгүл қойшының бір күні», «Өмір жорығы», «Сөз жоқ, соның іздері», «Боранды түнде», «Достар қалжыңы», «Қарлы жаңбыр астында», «Сілекеевтердің кенжесі» және т.б. бірқатар танымал әңгімелері еніп отыр. Автор қашанда адамзат үшін ананың орны бөлек екенін көрсете отырып, әйелдің нәзіктігі мен парасатын, перзенті үшін жанкештілігін көркем суреттейді. Сонымен қатар өмірдің әр алуан саласындағы адам тағдырларын, өзінің естеліктерін әңгімелеріне арқау етеді. Кітап көпшілік оқырман қауымға арналады.