Library catalog

«Көк бөрілердің көз жасы» романы Түркі қағанатынан соң ту далада ту тіккен Найман, Керей, Меркіт мемлекеттерінің дәуірлеу және жойылу тарихы арқылы Шыңғыс ханның Алтайдан Атырауға дейінгі қазақ ұлыстарын қалай біріктіріп, біртұтас мемлекетке айналдырғаны туралы ірі тарихи оқиғаға арналған. Романда керей Оң ханның қиын да қидалы тағдыры, Сәнгүннің шарасыздығы, Жамұқаның аярлығы, найман Таян ханның тәуекелі, Бұйрықтың опасыздығы, Көксау Саурық батырдың ерлігі, Құбатекін жыраудың елдің қамын жеп қайғыруы, Күшліктің қарсылығы мен қаталдығы, меркіт Тоқтабек пен ұлдарының қайсарлығы, Шыңғыс ханның жеке басының парасаты мен пендешілігі, қайырымдылығы мен қатыгездігі, әскери таланты т. б. жан-жақты, образды түрде ашып берілген. Романның тілі жатық, оқиғасы қызықты, сюжет пен мазмұн және композициясы шебер үйлесім тапқан. Бұл жолғы басылымында автор жекелеген атаулар мен мазмұндарына ішінара өңдеу жасады.

«Қажымұқан» хикаятында қазақ халқының атақты палуаны, классикалық күрестің дүниежүзілік чемпионы Қажымұқан Мұңайтпасовтың өмір жолы қызықты, тартымды баяндалған. Бұл — жаратылысынан күшті болған, оған өзінің қайсар мінезі қосылып, үнемі алға ұмтыла бергенінің арқасында әлемге танылып, талай мықтылардың жауырынын жер иіскеткен әйгілі палуан Қажымұқан Мұңайтпасов туралы шығарма. Авторы — Қажымұқанның өз аузынан 23 күн бойы бар оқиғасын арнайы тыңдап, жазып алған қазақтың көрнекті жазушысы Қалмақан Әбдіқадыров.