Library catalog

«Қазына аралы» кітабы — Роберт Стивенсонның қаламынан шыққан алғашқы туындыларының бірі. Роман таңғажайып оқиғаларға толы. Автор бұл кітабында баюдың жолын іздеген теңізшілердің Қазына аралына жасаған саяхаты жайында баяндайды. Бірде кешқұрым жазушы карталарды қолданып, ойнап отырған достарына қызыға қарайды да, айдаһардың түрі бейнеленген картаның суретін сала бастайды. Содан кейін түрлі сызықтарды белгілеп, саяхатқа шығуға арналған құпия аралдың картасын жасап шығарады. Осылайша автордың «Қазына аралы» кітабы пайда болады. Кітап көпшілік оқырманға арналған.

Көшпенділер – Ілияс Есенберлиннің «Алмас қылыш», «Жанталас», «Қаһар» атты үш кітаптан тұратын тарихи эпопеясы. Бұл шығарма – қазақ сөз өнерінің әлемдік нұсқасына қосылған тарихты көркемдік пайымдаудың үздік үлгілерінің бірі. Тарихи туындының «Қаһар» атты үшінші кітабы қазақ даласында дербес хандық орнатуды мақсат еткен Кенесарының қол жиып күреске шығуы, тәуелсіздік жолындағы күресті қолдамаған сұлтандарға және патша бекіністеріне шабуылы, Кенесарының билікке қол жеткізу үшін патша өкілдерімен жүргізген келіссөздері жайында баяндайды. Осы азаттық үшін күресте елдің күйзеліске ұшырауы, дұшпандарының Кенесарыға қарсы ұйымдасқан іс-әрекеттерін жазушы ашып көрсетеді.

Жазушының жүрегінен шыққан және бүгінгі дейін мәнін жоғалтпаған әсерлі роман. Кітаптың басты кейіпкерлері алғашқы парақтан-ақ өздерінің әлеміне жетелей жөнеледі. Біресе олармен бірге қуанасыз, біресе олармен бірге уайымдайсыз. Өзіндік қолтаңбасы бар жазушы Кен Кизидің туындысы оқырманын толғандырмай қоймайды. «Көкектің ұясы» — қорқыныш пен ессіздік жағдайында да адамдық қалпыңды сақтап қалуға, шындық пен қиял біте қайнасып кеткен кезде де өзіңді жоғалтып алмай, құлшыныспен өмір сүруге болатынын көрсететін роман. Сондай-ақ «Мен кіммін?» деген ең маңызды сұраққа жауап беретін туынды

«Құпия арал» — француз жазушысы Жюль Верннің шытырман оқиғаға толы ең қызықты романының бірі. Америка Құрама Штаттарындағы азаматтық соғыс кезінде тұтқынға түскен солтүстіктің ержүрек бес жігіті әуе шары арқылы қашпақ болады. Алайда алапат дауыл оларды елсіз аралдың жағалауына алып келеді. Бұрын-соңды жан баласы аяқ баспаған беймәлім аралдың бес тұрғыны білімі мен біліктілігіне сеніп жаңа өмір салтын қалыптастыруға тәуекел етеді. Ержүрек, батыл жігіттер өздерінің қабілет-қарымының арқасында көп нәрсеге қол жеткізеді. Әйткенмен бір күні олардың бейбіт өмірінің шырқын бұзып, аралға қарақшылар кемесі келеді. Бірақ аралдықтарға тылсым бір құдіретті күш көмек қолын созады… Ол кім? Аралдықтар жұмбақ жебеушілерін таба ала ма? Сауалдың жауабын шытырманға толы шығармадан табасыз.